လူ့အခွင့်အရေး မေးခွန်းနှင့်အဖြေများ

by မင်းမင်း လတ် on Saturday, August 18, 2012 at 7:31pm ·

၁။       လူ့အခွင်းအရေးဆိုသည်မှာ အဘယ်နည်း။

          လူသားတို့သည် မွေးဖွားလာကတည်းက တူညီသောဂုဏ်သိက္ခာနှင့် အခွင့်အရေးတို့ဖြင့် မွေးဖွားလာ ခဲ့ကြသည်။ လူသားဖြစ်သောကြောင့် တူညီသောဂုဏ်သိက္ခာများရှိကြပြီး ထိုဂုဏ်သိက္ခာရှိရှိ နေနိုင်ရန်အတွက် လိုအပ်သောအရာများသည် လူ့အခွင့်အရေးများပင်ဖြစ်သည်။ လူသားတစ်ယောက် အသက်ရှင်နေထိုင်နိုင်ရေး နှင့် ဂုဏ်သိက္ခာရှိရှိနေထိုင်နိုင်ရေးအတွက် မရှိမဖြစ်လိုအပ်သောအရာများကို လူ့အခွင့်အရေးဟူ၍ ယေဘူယျ အားဖြင့် အဓိပ္ပာယ်ဖွင့်ဆိုနိုင်သည်။

လူသားတို့သည် လူသားဖြစ်နေသော အချက်ကြောင့် ထိုအရာများကို လူတဦးချင်း တယောက်ချင်းတိုင်း ပိုင်ဆိုင်နေသည်။ မည်သူတို့ဖြစ်သာ သက်ဆိုင်သည်၊ မည်သူတို့ကတော့ဖြင့်ခံစားခွင့်မရှိဟူ၍ ခွဲခြား၍မရနိုင်ပေ။ ထိုအချက်များသည် လူသားအားလုံးနှင့် သက်ဆိုင်နေသည်။ ထိုအရာများကို အခြားမည်သူကမှ ယူဆောင် သိမ်းပိုက်၍မရချေ။ နိုင်ငံတော်အစိုးရတစ်ရပ်က ထိုအရာများကို နိုင်ငံသားတစ်ဦးဦးအား ခံစားခွင့်မပေးသည့် တိုင်အောင် လူသားတစ်ဦးဖြစ်သောကြောင့် ထိုအရာများကို ထိုနိုင်ငံသားက ခံစားပိုင်ခွင့်ရှိသည်။

ထိုအယူအဆများကို ယနေ့တွင် လူ့အခွင့်အရေးများဖြစ်သည်ဟူ၍ တွင်တွင်ကျယ်ကျယ် ပြောဆိုနေခြင်း ဖြစ်သည်။ နိုင်ငံတကာနှင့် နိုင်ငံတော်တရားဥပဒေများ ရေးဆွဲရာတွင် ထိုအယူအဆများကို ဆွေးနွေး၍ ထည့်သွင်းရေးဆွဲ ပြဌာန်းလာခဲ့ကြသည်။ တရားဥပဒေအရ အကာအကွယ်ပေးရမည့် အရာများအဖြစ် အသိအမှတ် ပြုလာခဲ့ကြသည်။


၂။       လူ့အခွင့်အရေးအယူအဆများသည် တကမ္ဘာလုံးနှင့် အကြုံးဝင်ပါသလား။

          ယခုအချိန်တွင် လူ့အခွင့်အရေးဟူ၍ မိမိတို့ တွင်တွင်ကျယ်ကျယ် ပြောဆိုနေသော လူသားတို့၏ ဂုဏ်သိက္ခာနှင့် တန်းတူညီမျှမှုတို့အပေါ် တန်ဖိုးထားသည့်အယူအဆများကို ရှေးယခင်ကတည်းကတည်ရှိ ခဲ့သော ဘာသာရေးအယူအဆများ ၊ ယဉ်ကျေးမှု ထုံးစံများအတွင်းတွင် တွေ့မြင်နိုင်သည်။ လူ့အခွင့်အရေး ဟူသော စကားလုံးကို ဒုတိယကမ္ဘာစစ်နောက်ပိုင်းမှသာ တွင်တွင်ကျယ်ကျယ်ပြောဆိုသုံးစွဲလာခြင်းဖြစ်သော် လည်း လူ့အခွင့်အရေးနှင့်သက်ဆိုင်သည့် အယူအဆသဘောတရားတို့ကို ရှေးနှစ်ပေါင်းများစွာကပင် အသွင် အမျိုးမျိုးဖြင့် လက်ခံကျင့်သုံးလာခဲ့ကြသည်။ ထိုအယူအဆနှင့်ဆင်တူသောအယူအဆများကို လူသားတို့၏ ယဉ်ကျေးမှုပေါင်းစုံ ထု့းတမ်းဓလေ့မျိုးစုံတို့တွင် တွေ့နိုင်သည်။

          ရှေးဟောင်းလူမှုအဖွဲ့အစည်းများအကြားတွင် `` မိမိအပေါ်ဆက်ဆံလိုသည့်ပုံစံအတိုင်း အခြားလူများကို မိမိကစတင်ဆက်ဆံပါ ´´ ဟူသော ထုံးတမ်းစဉ်လာများကို လက်ကိုင်စွဲ ကျင့်သုံးခဲ့ကြသည်။ ဟိန္ဒူ ဝေဒကျမ်းစာများ ၊ ဗုဒ္ဓဘာသာ ဟောကြားချက်များ ၊ ဘာဘီလိုးနီးယမ်းတို့၏ ဟာမူရာဘီ ကိုဓဥပဒေ ကျမ်းများ ၊ ခရစ်ယာန်သမ္မာကျမ်းစာများ ၊ အစ္စလာမ် ကိုရန်ကျမ်းစာများနှင့် ကွန်ဖြူးရှပ် အဆိုအမိန့်များတွင် ပါဝင်သော လူသားတို့ စောင့်ထိမ်းရမည့် ကိုယ်ကျင့်တရားများမှာ ယခုပြောဆိုနေသည့် လူ့အခွင့်အရေး အယူအဆတန်ဖိုးများ၏ အနှစ်သာရပင် ဖြစ်သည်။
 

၃။       ထိုတန်ဖိုးများသည် လက်တွေ့တွင် ဘယ်လိုအခြေအနေမျိုး ရှိနေပါသလဲ။

          လူ့အခွင့်အရေးနှင့် လူ့ဂုဏ်သိက္ခာများအား အသိအမှတ်မပြုမှုများကို ယနေ့တိုင် ရင်ဆိုင်တွေ့မြင်ရ လျှက်ရှိသော်လည်း လူသားတိုင်းသည် တူညီမှုရှိသည်ဟူသောအယူအဆကို လွန်ခဲ့သော ရာစုနှစ်ပေါင်းများ စွာကပင် လက်ခံကျင့်သုံးလာခဲ့သည်။ ၁၈ ရာစုနှင့် ၁၉ ရာစုကာလအတွင်းများက ဥရောပတိုက်တွင် `` လူသည် လူသားဖြစ်သောသဘာဝတရားကြောင့် အခွင့်အရေး ပိုင်ဆိုင်ခွင့် ရှိသည်။ နိုင်ငံတစ်နိုင်ငံ၏ နိုင်ငံသားဖြစ်သောကြောင့် ၊ လူမျိုးနှင့် ဘာသာရေးအုပ်စုဝင်ဖြစ်သော အကြောင်း အချက်များ
ကြောင့် မည်သူမှ အခွင့်အရေး ပိုမိုပိုင်ဆိုင်ခွင့်မရှိ ´´ ဟူသော သဘာဝအခွင့်အရေး ( Natural Rights ) အယူအဆပေါ်ထွန်း ခဲ့သည်။ လူသားတိုင်းတန်းတူဖြစ်သည်ဟူသောအယူအဆကို ရှေးနှစ်ပေါင်းများစွာကတည်းက ထိုသဘာဝ အခွင့်အရေးဥပဒေထဲတွင် လက်ခံခဲ့ ပြီးသားဖြစ်သည်။ သို့သော် လစ်လျူရှုမှုများ ၊ အစွဲများနှင့် တန်းတူညီမျှမှုကို လက်မခံသည့် မှားယွင်းသော အယူဝါဒများကြောင့် ခွဲခြား ဖိနှိပ်မှုများသည် ယနေ့တိုင်တည်ရှိနေဆဲဖြစ်သည်။ ထိုအယူဝါဒများကနေ၍ ရှေးယခင်နှင့် ယခုမျက်မှောက်အချိန်ထိ လိင်ကွဲပြားမှု ၊ အသားအရောင်လူမျိုး ၊ မျိုးရိုးနှင့် ဘာသာရေးအယူအဆကွဲပြားမှုကို အခြေခံ သည့် ကျွန်ပြုခြင်းများ ၊ ဖိနှိပ်ခွဲခြားမှုများဖြစ်ပေါ်စေရန် လှုံ့ဆော်ပေးနေလျှက်ရှိသည်ကို ၀မ်းနည်းဖွယ် တွေ့မြင်နေရ လျှက်ရှိသည်။

Credit : အောင်မျိုးမင်း ( ဒါရိုက်တာ ) ၊ လူ့အခွင့်အရေးပညာပေးဌာန ( မြန်မာနိုင်ငံ )